Ber Fiskeridirektoratet krevja at Forsvaret fjernar senka fregatt.
Til Fiskeridirektoratet
OPPMODING OM Å GJE PÅLEGG OM FJERNING AV SKIPSVRAK PÅ SVENSGRUNNEN.
SUBSIDIÆRT: OPPMODING OM AT FISKERIDIREKTORATET FJERNAR VRAKET PÅ EIGAR SIN REKNING
Me viser Forsvaret si senking av den utrangerte fregatten «KNM Bergen»
Som kjent blei fregatten senka på den viktige fiskebanken Svensgrunnen.
Fiskerinæringa har oppmoda Forsvaret om å fjerna fregatten. Det har Forsvaret avvist. Sjå vedlegg.
Me viser til havressurslova § 28, 2. ledd, jf. 1. ledd.
«Det er forbode å kaste, eller unødvendig etterlate reiskapar, fortøyingar og andre gjenstandar i sjøen eller på botnen som kan skade marint liv, hemme gjennomføring av hausting, skade haustingsreiskapar eller setje fartøy i fare.
Den som fer fram i strid med forbodet i første ledd, pliktar å rydde etter seg eller fjerne gjenstandane. Fiskeridirektoratet kan gje pålegg om rydding eller fjerning.
Vert pålegg etter andre ledd ikkje følgt, kan Fiskeridirektoratet setje i verk nødvendige tiltak for den ansvarlege si rekning og risiko. Utgifter ved slike tiltak er tvangsgrunnlag for utlegg.»
Me har stor forståing for at Forsvaret må øva. Me meiner likevel at fregatten ikkje burde vore senka i eit viktig fiskefelt, og at senkinga er ulovleg.
Fordi Forsvaret har avvist å fjerna vraket ber me om at Fiskeridirektoratet pålegg Forsvaret å fjerna vraket.
Me meiner altså at senkinga var ulovleg, og/eller unaudsynt. Vraket vil òg «hemme gjennomføring av hausting, skade haustingsreiskapar eller setje fartøy i fare.»
Når, ikkje om, fiskebruk set seg fast i vraket vil tapt fiskebruk føra til spøkelsesfiske. Det vil skada marint liv.
Vilkåra i § 28, 1. ledd er difor oppfylt.
Som nemnt har Forsvaret avvist å rydda etter seg, og fjerna vraket.
Me ber difor om at Fiskeridirektoratet brukar sin heimel i havressurslova § 28, 2. ledd, 2. pkt, og pålegg Forsvaret å fjerna skipsvraket KNM «Bergen». Dette sjølvsagt med ein høveleg frist.
Dersom Forsvaret ikkje etterkjem pålegget ber me om at Fiskeridirektoratet fjernar vraket for Forsvaret sin rekning og risiko, jf. § 28, 3. ledd.
For god ordens skuld gjer me merksam på at Forsvaret si senking, av KNM Bergen» er meldt til Politiet.
Men det er ikkje krav om at senkinga er straffbar for at Fiskeridirektoratet skal kunne krevja at vraket blir fjerna, eller for at Fiskeridirektoratet fjernar vraket for Forsvaret si rekning.
Ta gjerne kontakt dersom de har spørsmål eller eitkvart er uklårt.
Me ber òg om at Fiskeridirektoratet gjev tilbakemelding på om direktoratet vil etterkoma denne oppmodinga.
Brevet er signert av Pelagisk Forening, Norges Kystfiskarlag og Nord Fiskarlag